Qanun layihəsində tarixən Rusiya ərazisində yaşayan xalqların siyahısının dəqiqləşdirilməsi də təklif edilir.

Məsələ ilə bağlı Sfera.az-a danışan millət vəkili Arzu Nağıyev qanunun bütün rusdillilərə aid olmayacağını deyib:

"Bu layihənin müəllifi Rusiya Dövlət Dumasında MDB ölkələri üzrə komitənin müavini Azərbaycana da çox yaxşı tanış olan Konstantin Zatulindir. Onun bildirdiyi kimi, bu qanun bütün dünyada yaşayan rus dilini bilən ruslara aid deyil. Məlum məsələdir ki, ABŞ, Hollandiya, istərsə də Afrikada kimsə rus dilini bilə və bu dildə mükəmməl danışa bilər. Bu o demək deyil ki, onlar ruslarla həmvətən olur və fəaliyyətləri qanuniləşdirilir. Sadəcə olaraq Rusiyada xarici dövlətlərdəki soydaşlarla münasibətdə dövlət siyasəti haqqında qanun var. Bu qanuna uyğun olaraq Rusiyada yaşayan və rus dilində danışmağı bacaran  hər bir Rusiya vətəndaşına məhz bu qanun şamil oluna bilər”. 

Deputat yeni qanunun Rusiyaya olan köçlə əlaqəsi məsələsinə də toxunub:

"Son vaxtlarda müxtəlif ölkələrdən Rusiyaya köç var. Orta Asiyadan olan müxtəlif millətlərin nümayəndələrinin Rusiyaya axını başlayıb. Onlar əvvəl arayış təqdim etdilər ki, rus dilini bilirlər, lakin məlum oldu ki, belə deyil. Düşünürəm ki, rus dilini bilən bütün insanların Rusiya vətəndaşı olması, həmvətən kimi qəbul olunması absurd məsələdir. Demək olar ki, Sovet dönəmində yaşayan hər bir şəxs rus dilini bilir. Belə çıxır ki, onlar da ruslarla həmvətən hesab olunmalıdır? Əsas məsələ ondan ibarətdir ki, bu qayda Rusiyada yaşayan və milliyətindən asılı olmadan rus dilini bilən şəxslərə şamil olunacaq”.