Buğdanın qiymətinin artmasının Azərbaycana təsirləri - Çörək yenidən bahalaşacaq?
11:38 / 16.05.2022
2124
Bu həftənin ilk günündə Çikaqo birjasında buğdanın dəyərində növbəti kəskin artım qeydə alınıb. Ötən həftənin sonu bir tonu 429 dollara satılan buğdanın qiyməti saat 11:00-a olan məlumata əsasən 455 dolları ötüb. Birjalar açılanda buğdanın dəyərində 5 faizdən çox artım baş verib.
Sfera.az bildirir ki, həftənin ilk günüdə buğdanın qiymətində sıçrayış Hindistan hökumətinin qəbul etdiyi qərarla bağlıdır. "Bloomberg”in məlumatına görə Hindistan ərzaq təhlükəsizliyi riskinə görə buğda ixracını qadağan edib. Dehli rəhbərliyi bu addımı ilə ilin əvvəlindən qlobal bazarlarda artan buğda qiymətlərinə ölkə daxilində nəzarət etməyi hədəflədiyini açıqlayıb.
Hindistan buğdasını əsasən qonşu ölkələrə - Banqladeş, Nepal və Şri-Lankaya ixrac edir.
Çikaqo birjasında qiymət dəyişikliklərinin təhlili göstərir ki, buğdanın dəyərində son bir həftədə nəzərəçarpacaq artım olub. Mayın 9-da bir tonun qiyməti 395 dollar olan buğdanın dəyəri həftə ərzində 60 dollar, yəni 15 faizdən çox artıb.
Buğdanın bahalaşmasının Azərbaycana da mənfi təsirləri var. Biz buğdanın qiymətinin artmasının mənfi təsirini ilin əvvəlində gördük. 2022-ci ilin ilk günlərindən "dairəvi çörək” kimi tanınan zavod çörəyinin qiymətinin 50 qəpikdən 60 qəpiyə yüksəlməsi məhz buğdanın bahalaşması ilə bağlı oldu.
Lakin təəssüflər olsun ki, buğdanın qiymətində artım ilin əvvəlindən bəri nəinki dayanmayıb, əksinə bir qədər də güclənib. İlin əvvəlində Çikaqo birjasında buğdanın bir tonunun qiyməti 285 dollar olduğu halda, hazırda 455 dollardır. Ötən 5-6 ay ərzində buğdanın dəyəri 170 dollar, yəni 60 faiz artıb.
Bəs, bu qiymət dəyişikliyi Azərbaycanda çörəyin yenidən bahalaşmasına səbəb ola bilərmi?
Qiymətlərin təhlili göstərir ki, 2022-ci il ərzində buğdanın bahalaşmasına görə əslində çörək də bahalaşıb. Sadəcə olaraq qiymət artımı çörəyin bir ədədində deyil, çəkisində qeydə alınıb. Belə ki, istehsalçılar çörəyin bir ədədinin qiymətini artırmasa da, onun çəkisini azaldıb.
Bunu çörəyin bir kiloqramının qiymətinə dair açıqlanan rəsmi məlumatlar da təsdiqləyir. Dövlət Statistika Komitəsinin məlumatına əsasən, yanvarın sonunda buğda unundan bişirilən çörəyin bir kiloqramının qiyməti 1,12 manat olduğu halda martda 1,16 manat, apreldə 1,17 manat olub. Böyük ehtimalla mayda qiymətlər 1,2 səviyyəsinə çatıb. Bu məlumatlar göstərir ki, son 3-4 ayda çörək 7 faizdən çox bahalaşıb.
Qeyd edək ki, çörəyin qiyməti buğda ununun dəyərindən birbaşa asılıdır. Son aylarda çörək qiymətləri buğda ununun qiymətindəki artım dinamikasına uyğun dəyişib.
Vasif
Sfera.az
