Azərbaycanda 2022-ci ilin mayın 1-dən qapalı məkanlarda tibbi maskalardan istifadə tələbi qüvvədən düşəcək. Bundan sonra qapalı məkanlara daxil olan şəxslər üçün tibbi maskadan istifadə etmək könüllü olacaq.


Xatırladaq ki, Azərbaycanda 2020-ci ilə qədər tələb böyük olmadığından tibbi maska istehsalı həyata keçirilməyib. 2020-ci ildə sərt karantin qaydaları ilə əlaqədar qoruyucu vasitələrdən istifadə etmək məcburi olduğundan həm ölkəmizdə tibbi maska istehsalı təşkil edildi, həm də bu məhsulların idxal miqdarı dəfələrlə artırıldı.

İki il əvvəl Sumqayıtda 2 tibbi maska istehsalı müəssisəsi və qoruyucu kombinezonların istehsalı müəssisəsi işə salınıb. Bu müəssisələrlə bərabər xaricdən çoxlu sayda maska idxalına başlanılıb.

Rəsmi məlumatlara görə, 2020-ci ildə ölkəmizdə 28,7 milyon ədəd tibbi maska istehsal olunub. İstehsal 2021-ci ildə 45,6 faiz artaraq 41,8 milyon ədədə yüksəlib. 2022-ci ilin birinci rübündə də istehsalda artım olub. İlk rübdə 11,6 milyon ədəd və ya əvvəlki ilin eyni dövrü ilə müqayisədə 61,1 faiz çox tibbi maska istehsalı qeydə alınıb. İstehsal artmaqla idxal da artıb. 2021-ci ildə 5,077 milyon dollar dəyərində 121,63 milyon ədəd idxal həyata keçirilib. 2022-ci ilin yanvar-fevral ayları ərzində 338 min dollar dəyərində 8,172 milyon ədəd tibbi maska idxal edilib. Böyük ehtimalla qərarın qüvvəyə minməsindən sonra tibbi maska istehsalı kəskin şəkildə azalacaq. Amma bu, istehsal müəssisələrinin dayanmasına səbəb olmaya bilər. Çünki həmin müəssisələr tibbi maska ixracını da həyata keçirir. 2021-ci ildə 77 min dollar dəyərində 5,29 milyon ədəd, 2022-ci ilin yanvar-fevral ayları ərzində isə 74,7 min dollar dəyərində 2,49 milyon ədəd tibbi maska ixrac olunub.