Sfera.az xəbər verir ki, bunu Azərbaycan Dövlət İnformasiya Agentliyinin (AZƏRTAC)idarə heyətinin sədri Aslan Aslanov Ulu Öndər Heydər Əliyevin 99 illiyi münasibətilə təşkil olunmuş "Heydər Əliyev və müstəqil Azərbaycan mediasının inkişafı" adlı tədbirdə çıxışı zamanı bildirib.

A.Aslanov Heydər Əliyevin Azərbaycan mətbuatı tarixindəki xüsusi rolunu yüksək qiymətləndirib:

"Bəşər tarixi çox görkəmli şəxsiyyətlər yetirib, lakin xalqının ən ağır günündə xalqı ilə birgə olan, vətənini aydınlığa çıxaran liderlər çox azdır. Azərbaycan xalqı şanslıdır ki, onun Heydər Əliyev kimi öndəri var. O, 30 il müddətində siyasi hakimiyyətin zirvəsində oldu. Heydər Əliyev hələ sağlığında canlı əfsanəyə çevrilmişdi. Onun mətbuatın inkişafı yolunda atdığı addımlar barədə xeyli danışmaq olar. Yenilməz iradəyə malik bir şəxsin Azərbaycana rəhbər olması ilə mətbuatda görünməmiş inkişaf baş verdi. Heydər Əliyevin 1969-82-ci illərdəki birinci hakimiyyəti dövrünü  milli özünüdərkin inkişafı dövrü kimi də dəyərləndirmək olar. O, mətbuata, jurnalistlərə xüsusi həssaslıqla yanaşırdı. O, söz və mətbuata yaşıl işıq yandırdı".

A.Aslanov Ümummilli liderin mətbuatın üç prinsip əsasında inkişaf etməsidən yana olduğunu diqqətə çatdırıb:

"Ümummilli liderin milli mətbuatın inkişafı ilə bağlı işlərindən danışarkən medianın üç prinsip ətrafında inkişafı məsələsinə diqqət çəkmək olar. Bu prinsiplər dövlətçiliyə xidmət, azərbaycançılıq ideologiyasının təbliği və ümumbəşəri dəyərlərə hörmətlə yanaşma prinsipləridir. Azərbaycan mətbuatı məhz bu prinsiplər ətrafında örnək olacaq uğurlara imza atdı".

Qeyd edək ki, sözügedən tədbir Azərbaycan Respublikasının Medianın İnkişafı Agentliyi və AZƏRTAC-ın birgə təşkilatçılığı ilə baş tutub.