Hansı ölkələrin gəncləri daha depressivdir? - SİYAHI
15:00 / 14.02.2022
772
Gəncləri ən çox depressiv əlamətlər sərgiləyən ölkələrin adları açıqlanıb.
Sfera.az bildirir ki, pandemiyanın səbəb olduğu iqtisadi böhran, siyasi iqtidarsızlıq, işsizlik kimi əsas faktorların təsiri ilə bağlı tələbələr arasında araşdırma aparılıb. 26 ölkədən 99 min 689 gəncin iştirak etdiyi tədqiqatlar zamanı depressiya əlamətləri sərgiləyən ilk ölkənin Türkiyə olduğu müəyyən olunub.
Bununla bağlı araşdırmanı həyata keçirən sosioloq Sarah Van de Velde tezisində belə yazıb:
"Türkiyədə tələbələr artıq mövcud siyasi iqtidarsızlıq və geriləyən iqtisadi şərtlərlə qarşı-qarşıya qalıblar. Bununla belə, Türkiyə pandemiya dövründə vətəndaşlara ən az maliyyə yardımı ödənilən ölkələr sırasında yer aldı və gənclər arasındakı işsizlik baxımından ən güclü artımlardan birini yaşadı”.
Sosioloq, həmçinin sözügedən ölkədə universitetlərin pandemiya zamanı nə vaxt bağlanacağına dair qeyri-müəyyənliyin yaşandığını və bunun da depressiv vəziyyətə təsir etdiyini əlavə edib.
Araşdırmada Türkiyədən sonra gənclərinin depressiv halda olduğu digər ölkələr arasında Cənubi Afrika, İspaniya, ABŞ və İngiltərə də yer alıb. Digər tərəfdən, Skandinaviya ölkələrindəki (İslandiya, Norveç, İsveç, Danimarka və Finlandiya) və Fransadakı tələbələrin ən aşağı depressiv əlamətlərə sahib olduqları ortaya çıxıb.
Günay Rəsulqızı
Sfera.az