Bunu Sfera.az-a açıqlamasında tibb elmləri doktoru, professor Musa Qəniyev deyib. O bildirib ki, koronavirus haqqında yalnız keçmiş zamanda danışılmalı və müzakirələr də bir məqsədə xidmət etməlidir: 

"Pandemiya davam etdiyi müddətdə bu infeksiyanın müalicə və profilaktikası istiqamətində, strategiyanın qurulması və taktiki gedişlərdə, hansı ciddi səhvlərə yol verilib? Bu səhvlər araşdırılmalı, təhlil edilməli və onlardan nəticə çıxarılmalıdır. Keçən yaz yoluxma və ölüm halında kəskin artım, COVİD-19-un  "əsrin faciəsi” olması fikrinin insanların beyninə yeridilməsinin nətisəsi olaraq, əksəriyyətin profilaktik məqsədlə müxtəlif antiviral preparatları, geniş təsir spektrli antibiotik və sair kimi lazımsız dərmanları qəbul etməsi idi. Sağlam şəxslərin immunomodulyator və ya antiviral preparatları qəbul etməsi, şəxsin öz-özünə qəsd etməsidir”.

Mütəxəssis qeyd edib ki,  immunomodulyatorlar koronavirusa yoluxma halında "sitokin fırtınasını” tətikləyir, antivirallar isə, nəzarətsiz qəbulda neyro-humoral və immun sistemi dağıdır:

"İnsanlar apteklərdən "od qiymətinə” aldığı – hətta bəziləri bu dərmanları almaq üçün, banklardan kredit götürürdülər - və virusa yoluxmamaq məqsədilə qəbul edib, özlərini zəhərlədikləri antivirallardan hansının, COVİD-19-un  bu günkü müalicə protokollarında olduğuna baxsınlar. Digər tərəfdən keçən payızda yoluxmanın artmasının səbəbi isə, uzunmüddətli sərt karantin tədbirlərinin nəticəsi olaraq, virus və canlı orqanizm arasında birgə yaşayış prinsipinin pozulması idi. 

Hazırda koronavirusa yoluxmayan bir nəfər belə insan yoxdur. İstər bu, istər kütləvi vaksinasiyanın nəticəsi olaraq, formalaşan kollektiv immunitet, istərsə də virusda növbələşən genom mutasiyası, koronavirusu fəsli infeksiyaya çevirib. Yoluxmada müşahidə olunan hazırkı artım mütləq qanunauyğunluqdur. Bundan qorxmaq lazım deyil”.