“Yerli icra hakimiyyətləri hara baxır?” – QHT sədri doğuş zamanı ölən 15 yaşlı qıza görə onları ittiham etdi
Sfera.az bildirir ki, bunu "Təmiz Dünya” Qadınlara Yardım İctimai Birliyinin sədri Mehriban Zeynalova deyib. O bildirib ki, indiyə kimi aparılmış tədbirlər daha çox evlənən şəxsə yönəlik olur:
"Amma heç kim demir ki, yerli icra hakimiyyətləri dövlətin ərazi üzrə siyasətini icra edən qurumlardır və bu qurumların daxilində də məhz bu məsələlər üzrə komissiyalar fəaliyyət göstərir. Nə qədər ki, azyaşlı ilə nikaha girən şəxslə yanaşı, dövlət siyasətini icra edilməsi tapşırılan yerli qurumlar bu məsələdə, həmin şəxslə birgə cəza almayacaq, problem davam edəcək”.
M.Zeynalova əlavə edib ki, yerli icra orqanları kiminsə həyətində bir daş tərpədiləndə dərhal məlumatlı olur, amma o boyda uşaq yerindən tərpədilir xəbər tutmurlar:
"Düşünürəm ki, bu cür hallarla bağlı yerli icra orqanları sorğulanmalıdır. Hara baxırdınız? İcra edə bilmirsən, Allah yaxşı yol versin, get. Qoy bacaran, biganə olmayan, sterotiplərlə yaşamayanlar bunu icra etsin. Məsələni bu formada konkret tələb etmək lazımdır”.
Xatırladaq ki, fevralın 4-də, saat 18 radələrində paytaxtın Xəzər rayonu, Binə qəsəbəsinin 06 may 2006-cı il təvəllüdlü sakini və bətnindəki döl ölüb.
Günay Rəsulqızı
Sfera.az