Türkiyədə silah fabrikinin direktoru milli silaha aid planları Amerika firmalarından birinə satarkən həbs olunub.

Sfera.az anspress-ə istinadən bildirir ki, fabrikin rəhbəri barədə "dövlət sirrlərindən mənfəət əldə etmək", "dövlət xidmətlərinə sədaqətsizlik" ittihamları ilə məhkəmə iddiası qaldırılıb.

Bildirilir ki, "Makina Kimya İnstitutu" (MKE) Kırıkkale silah fabrikinin direktoru Mustafa Tanrıverdi 22 milyon dollara başa gələn "MPT-76" milli piyada silahına aid məlumatları satmağa çalışıb. Tanrıverdinin həmin silahın dizaynını və istehsal planını 1.2 miyon lirəyə (642 min AZN) Amerika silah şirkətlərindən birinə satmağa cəhd edərkən saxlanıldığı bildirilir.  

Direktorun saxlanılması silah fabrikindən polis idarəsinə daxil olan məlumatdan sonra mümkün olub. Şübhəlinin Amerikadan alınaraq yenilənmiş "MP-5" avtomat silahının planlarını satmağa cəhd etdiyi bildirilir.   

Satış barədə daha əvvəldən xəbər alan xüsusi xidmət orqanlarının əməkdaşları şübhəlinin telefon danışıqlarını dinləyib. Ankara Mütəşəkkil Cinayətkarlıqla Mübarizə şöbəsinin dedektivləri isə şübhəlinin izləyiblər.
Ankarada restorasnlardan birində görüşməyə qərar verilib. Şübhəli gəlmədən müştərilər çıxarılıb və onların yerinə polis yerləşdirilib. Silahların planlarını Amerikan firmasının əməkdaşlarına verən şübhəli daha əvvəl seriya nömrələri götürülmüş pulların olduğu çantanı götürərək restorandan çıxıb. Polis dedektivləri şübhəlini cinayət üstündə yaxalayıblar.   

Prokurorluğun təlimatı ilə şübhəlinin evində və xidməti kabinetində axtarış aparılıb və evdəki kompüterlə rəqəmsal sənədlər müsadirə edilib.

Mustafa Tanrıverdi ilkin istintaq zamanı işlədiyi cinayəti etiraf edib. Prokurorluğa aparılan şübhəli ittiham edildiyi məhkəmə tərəfindən həbs olunaraq türməyə göndərilib.