Bu sözləri Sfera.az saytına açıqlamasında dərs yükünün ağır olmasına hansı amillərin səbəb olduğuna aydınlıq gətirərkən təhsil eksperti Kamran Əsədov deyib. 

Ekspert bildirdi ki, müəlliflər tərəfindən hazırlanan dərslikləri Təhsil Nazirliyi yoxlamaq səlahiyyətinə malik deyil: 

"Ancaq müəyyən ekspertlər özləri istədikləri kimi dərslikləri hazırlayırdı. İstənilən şəxs özünün disertasiya işini kitablara köçürmüşdü. Bu isə həmçinin prosesdə monopoliyanın olmasının göstəricisi idi. Universitetlərdə tələbələr semestr imtahanlarını orta məktəb dərslikləri əsasında verirlər. Bu da onu göstərir ki, orta məktəb dərslikləri kifayət qədər ağırdır. Dəsrliklər müəlliflər tərəfindən yazılır və Təhsil Nazirliyinin isə onu yoxlama mexanizmi yoxdur. Daha çox çalışılır ki, əmək bazarına yüksək bilikli insanlar daxil olsun. Amma unudurduq ki, kadrlar orta məktəblərdə deyil, ali məktəblərdə yetişdirilir. Təəssüf ki, bu gün orta məktəblərin ibtidai siniflərində dərsliklər hədsiz dərəcədə ağırdır. Yəni informasiya yükü həddən artıq çoxdur”. 

Ekspertin dediyinə görə, indiyə kimi dərslikləri Təhsil Nazirliyinin sifarişi əsasında nəşriyyatlar yazırdısa, bundan sonra bütün prosesi birbaşa olaraq nazirliyin özü həyata keçirəcək: 

"İbtidai sinif proqramlarından lazımsız paraqraflar çıxarılacaq, həcmi azaldılacaq. Dərsliklərin sadələşdirilməsinə, şagirdlərin yaş xüsusiyyətinə uyğun olaraq yazılmasına diqqət ayrılacaq. Qarşıdan gələn 3 il ərzində bu proses ilk növbədə ibtidai siniflər üçün həyata keçiriləcək. Ardınca dərsliklərin sadələşdirilməsi prosesi yuxarı sinifləri də əhatə edəcək. Hazırda tarix kitablarında o qədər informasiya yükü, tarixi faktlar var ki, onu akademiklər belə tam olaraq yadda saxlaya bilmir. Bunlar isə standartlara uyğun deyil. Həmin səbəbdən Təhsil Nazirliyi yerlərdən bu istiqamətdə gələn müasir çağırışları dəyərləndirmək qərarına gəldi. Tədris yükü bölüşdürüləcək”.