Maraqlıdır, belə şəxslərlə bağlı qanunvericilikdə hansı cəzalar nəzərdə tutulub.

Bununla bağlı Sfera.az-a açıqlama verən vəkil Turan Abdullazadə qeyd edib ki, İnzibati Xətalar Məcəlləsinə əsasən, döymə və sair zorakı hərəkətlərlə qəsdən fiziki ağrı yetirməyə görə şəxs üç yüz manatdan beş yüz manatadək məbləğdə cərimə edilir:

"Və ya işin hallarına görə, xətanı törədənin şəxsiyyəti nəzərə alınmaqla, iki ayadək müddətə inzibati həbs tətbiq olunur. Qeyd olunmalıdır ki, həmin əməllər sağlamlığa ağır, az ağır və ya yüngül zərər vurmaqla törədildikdə, Cinayət Məcəlləsinin müvafiq maddələrinə əsasən cinayət məsuliyyətinə səbəb olur. Cinayət Məcəlləsinə əsasən, sağlamlığın qısa müddətə pozulmasına və ya ümumi əmək qabiliyyətinin cüzi itirilməsinə səbəb olmuş qəsdən sağlamlığa yüngül zərər vurma—min manatdan min beş yüz manatadək miqdarda cərimə və ya iki yüz qırx saatdan üç yüz altmış saatadək ictimai işlər və ya bir ilədək müddətə islah işləri və ya bir ilədək müddətə azadlığın məhdudlaşdırılması və ya bir ilədək müddətə azadlıqdan məhrumetmə ilə cəzalandırılır”.

Müsahibimizin sözlərinə görə, bu kimi hallardan hüquq mühafizə orqanlarına şikayət olarsa, adətən xəsarətin dərəcəsini müəyyən etmək üçün məhkəmə-tibbi ekspertizası təyin olunur:

"Verilən ekspert rəyinin nəticəsindən və xəsarətin dərəcəsindən asılı olaraq, hadisəni törədən şəxs müvafiq məsuliyyətə cəlb olunur. Həmçinin bir vəkil kimi hesab edirəm ki,  sözügedən hadisədə şəxsin əməllərində təkrarçılıq, davamedicilik və səbəbsiz şəkildə cəmiyyətə açıqca hörmətsizlik ifadə olunduğu üçün  əməldə xuliqanlıq cinayətinin də tərkibi var. Belə ki, Cinayət Məcəlləsinə əsasən, xuliqanlıq, yəni ictimai qaydanı kobud surətdə pozan, cəmiyyətə açıqca hörmətsizlik ifadə edən, şəxslər üzərində zor tətbiq olunması ilə, və ya belə zorun tətbiq edilməsi hədəsi ilə, habelə özgənin əmlakının məhv edilməsi, yaxud zədələnməsi ilə müşayiət edilən qərəzli hərəkətlər— min manatdan üç min manatadək miqdarda cərimə və ya bir ilədək müddətə islah işləri və ya bir ilədək müddətə azadlığın məhdudlaşdırılması və ya bir ilədək müddətə azadlıqdan məhrum etmə ilə cəzalandırılır”.

Xatırladaq ki, hadisə fevralın 5-də "İnşaatçılar" metrostansiyasının çıxışında baş verib. Atasının bildirdiyinə görə, sifətinə dəyən şillənin təsirindən qızın burnundan qan açılıb.