İmran Xanı hakimiyyətdən kimlər və niyə devirdi?
22:40 / 11.04.2022
2892
"Pakistanda illər uzunu baş nazirlər və hökumətlər korrupsiya ittihamları ilə üzləşiblər. Baş nazirlər vəzifədən sonrakı illərdə korrupsiya ittihamları ilə ya həbs olunublar, ya da Pakistanı tərk edərək əsasən Londonda siyasi sığınacaq tapıblar. Bu dəfə isə durum fərqli idi. Pakistanın Baş naziri İmran Xan xarici və təhlükəsizlik siyasətinə görə hədəf götürülüb".
Sfera.az xəbər verir ki, bu sözləri politoloq Elxan Şahinoğlu Pakistan Baş naziri İmran Xana etimadsızlıq göstərilməsi və müxalifətin yeni baş nazir seçməsinə münasibət bildirərkən deyib.
O bildirib ki, İmran Xanın Çinlə yanaşı Rusiya ilə yaxınlaşması müxalifətin və pakistanlı generalların xoşuna gəlmədiyi üzə çıxıb:
"Pakistan İmran Xandan əvvəl də Çinlə sıx əlaqələr qurub. Bu siyasi ittifaq Hindistanın əleyhinədir. Çinin Pakistana böyük yatırımları da mövcuddur.
Pakistanın xarici siyasətində Rusiya amili yenidir. Görünür, bunda da Çin amili rol oynayıb. Rusiya ilə strateji tərəfdaş olan Pekin İslamabada da eyni "siyasəti” təklif edib. Rusiya Prezidenti Vladimir Putin Ukraynaya qarşı işğalçı müharibədən bir neçə gün əvvəl İmran Xanı Moskvada qəbul edib. Bu, Pakistan müxalifətiylə yanaşı, ABŞ-ın da xoşuna gəlməyib. İmran Xan əmindir ki, onun parlamentdə devrilməsində Vaşinqtonun rolu olub. İmran Xan müxalifət nümayəndələrini ABŞ səfirliyində müzakirələrdə iştirakda ittiham edib. Vaşinqtonun son illərdə Hindistanla qurduğu sıx siyasi və hərbi əlaqələr Pakistanın hərbi dairələrində narahatlıq doğurub. Pakistan generalları hesab edə bilərdilər ki, İmran Xanın Çin və Rusiya ilə yaxınlığı ABŞ-Hindistan ittifaqını daha da gücləndirir və ona görə onların da baş nazirlə yolları ayrılıb”.
