İranın paytaxtı Tehranda bu ölkənin dövlət başçısı Həsən Ruhani və rəsmi şəxsləri ilə Azərbaycan Prezidenti İlham Əliyevin başçılıq etdiyi nümayəndə heyəti arasında geniş tərkibdə görüş keçirilib.
Oxu.Az İranın dövlət başçısını nsaytına istinadən xəbər verir ki, tədbirdə çıxış edən prezident Həsən Ruhani iki ölkə arasında əlaqələrin və əməkdaşlığın inkişafı ilə bağlı məmnunluğunu ifadə edib.
O, Tehran-Bakı əlaqələrinin strateji olduğunu vurğulayaraq, İran və Azərbaycanın iqtisadi əməkdaşlıq üzrə birgə komissiyasının əlaqələri inkişaf etdirməyə çalışdığını bildirib.
"Biz iki ölkə arasında əməkdaşlığı inkişaf etdirmək üçün potensialımızı artırmalı və bütün imkanlardan istifadə etməliyik”, - deyə, H. Ruhani qeyd edib.
Azərbaycanın İran xaxlqının nüvə hüquqlarına daimi dəstəyini qeyd edən Ruhani başçılıq etdiyi dövlətin əsas siyasətinin qonşu dövlətlərin müdafiəsi və onların ərazi bütövlüyünün qorunmasına yönəldiyini vurğulayıb.
"Qonşu dövlətlərlə bu sahədə əməkdaşlıq bizim üçün çox vacibdir”, - deyə, Ruhani bildirib.
Digər ölkələrin daxili işlərinə xarici müdaxilədən danışan Həsən Ruhani bildirib ki, "bu gün biz xüsusilə də insan haqları məsələlərində Qərbin ikili standartları ilə qarşılaşmışıq və biz regional problemləri müdrikliklə və məntiqlə həll etməliyik”.
O həmçinin İran və Azərbaycan arasında regional təhlükəsizliklə bağlı yekdil rəyin olduğunu vurğulayıb və regionda sülh, dostluq, təhlükəsizlik və sabitliyin möhkəmləndirilməsi üçün qarşılıqlı əməkdaşlığın əhəmiyyətini qeyd edib.
"İran İslam Respublikası Xəzər dənizini qonşularla sülh dənizi kimi nəzərdən keçirir və biz iki ölkə arasında birgə əməkdaşlığın inkişafı üçün əlverişli danışıqlar apardıq”, - deyə, o, bildirib.
İranın Azərbaycanla birgə müəssisələr yaratmağa hazır olduğunu bildirən Ruhani qeyd edib:
"Biz ümid edirik ki, Astara-Astara stansiyası vasitəsilə Azərbaycan və İranın dəmir yollarını birləşdirə biləcəyik və bu, Şimal-Cənub dəhlizinin inkişafında effektiv rol oynayacaq”.
İran və Azərbaycan arasında mədəni əməkdaşlığın inkişafını vurğulayan Ruhani qeyd edib ki, islam ekstremizmə və zorakılığa qarşıdır.
İran prezidenti həmçinin ətraf mühitin mühafizəsindən və Xəzərin çirklənməsinə qarşı mübarizədən, həmçinin gəmiçiliyin və dənizdə mövcud əməkdaşlıq potensialından istifadənin genişləndirilməsindən danışıb.
Tədbirdə çıxış edən Azərbaycan Prezidenti İlham Əliyev İrana səfərindən məmnunluq ifadə edib.
"İran və Azərbaycanın əlaqələri əhəmiyyətli dərəcədə inkişaf edib və iki ölkənin vəzifəli şəxsləri bu əlaqələrin bütün istiqamətlər və səviyyələr üzrə dərinləşdirilməsi üçün yollar axtarırlar.
Ümumi tarix və mədəniyyət İran və Azərbaycan Respublikası arasında əlaqələri qırılmaz edib”, - deyə, İlham Əliyev vurğulayıb.