Mövzu ilə bağlı Sfera.az-a açıqlama verən tibb elmləri doktoru, professor Musa Qəniyev bildirib ki,  yoluxmaların artması normaldır və bu, qaçılmaz prosesdir. Onun sözlərinə görə, mövcud vəziyyəti başqa bir hal kimi yox, yalnız statistik artım kimi dəyərləndirmək lazımdır:

Yoluxma sayı hətta 5-6 rəqəmli olsa belə, bunun xüsusi narahatlığa səbəb olan elmi əsası yoxdur. Bu hal sərt  karantin səbəbindən, fəsli patogen virusların müəyyən növbələşmə dövrünə qədərki, nisbi  "aqressivləşməsidir”. Bunun COVİD-19, onun "Omikron” və ya hər hansı bir digər bir ştamının fəallaşması ilə mütləq əlaqə və birbaşa bağlılığı yoxdur. Təbii qanunauyğunluğa görə, məlum zaman və məkan daxilində bütün xəstələnmə və ölüm halı, dominant olaraq öndə olan infeksiyaya bu və ya digər dərəcədə bağlı olur.  Hər bir insan il ərzində 2-3, bütün ömrü boyu isə 200-220 dəfə müxtəlif viral infeksiyaya  yoluxur”.

Professor qeyd edib ki, bu gün kütləviləşən boğazda ağrı, burunda tutqunluq, kəskin öskürək və temperaturun subfebril, nadir hallarda febril göstəriciyə yüksəlməsilə müşahidə olunan klinik vəziyyətin aktiv davam etmə müddəti 5-7 gündür:

"Bundan sonra hətta bir müddət öskürək və burunun axması əlamətləri saxlanıla da bilər. Məlum xəstə qrupları nəzərə alınmazsa, təbii immunitet və vaksinasiya səbəbindən, virus aşağı tənəffüs yolu subhüceyrəvi strukturlarına qarşı nisbi inaktivdir. Odur ki, infeksiyanın aşağı tənəffüs yollarına transformasiyası, yəni atipik pnevmoniyanın inkişafı ehtimalı minimumdur. Pnevmoniya kimi ağırlaşma uşaqlarda isə, ümumiyyətlə müşahidə edilmir. Hələ bir neçə ay bundan əvvəl, dekabr, yanvar ayında yoluxmanın kəskin artacağı, lakin virusun aktiv virulentliyinin 7 gündən artıq  davam etməyəcəyini bildirmişdim. Deməli ÜST, karantin müddətini 7 günə endirməklə, zamanında söylədiklərimi təsdiq etdi. Yəni pandemiya artıq başa çatır”.