Maraqlıdır, cəmiyyətimizdəki bu tələbat nədən irəli gəlir? 

Bununla bağlı Sfera.az-a açıqlama verən sosioloq Lalə Mehralı sözügedən şəxsləri o qədər də etibarlı hesab etmədiyini vurğulayıb. Müsahibimizin sözlərinə görə, adətən "yaşam koçları”nın hansı mərhələlərdən keçdiyi, təhsilləri haqqında məlumat bəlli olmur:

 

"Ümumiyyətlə, həyatımız üçün "yaşam koçu”nun nə əhəmiyyəti var? Bu da müəmmalı məsələdir. Bu gün "Instagram”da pul qazanmaq üçün hərə bir üsuldan istifadə edir. Özünü "yaşam koçu” elan edən insanları da bu kateqoriyaya aid edərdim. Çünki həmin şəxslər bir növ psixoloq rolunu oynayırlar. Əgər psixoloq varsa, "yaşam koçu” niyə lazımdır? Mənim necə yaşayacağıma niyə başqaları qərar verməlidir? Bunu qəbul etmək olmur. İnsan onsuz da öz doğrularını, yanlışlarını bilir. Bəzən həyatında problemlər olan insanlar psixoloq yardımı alırlar və bilirik ki, şəxslər ora yönləndirilir. Amma Türkiyədə 3 ay kurs keçib, gəlib burda "yaşam koçu” olan insanları qəbul etmirəm. Onlar bu gün sosial şəbəkələrdə ayaq açıb yeriyirlər. Bu, rahat pul qazanmağın ən geniş yayılmış formasıdır”.

L.Mehralı qeyd edib ki, hər gün bir "yaşam koçu”nun maskası yırtılır, ifşa edilir:

"Onlar necə böyük pullar ətrafında oyun qururlar, nə qədər qazanc əldə edirlər – bu, çox təəccüblüdür. Adi 5 manata hər yerdə gördüyümüz pulqabını guya enerji yükləyərək 300, 500, hətta 1000 manata belə satırlar ki, bu, bərəkətlidir, əlinizə keçəndə çoxlu pul qazanacaqsınız və s. Həmin məbləği verib 5 manatlıq pulqabı alan insanlar kifayət qədərdir. "Yaşam koçu”nun dediyi onlar üçün qanundur. Hesab edirəm ki, fırıldaqçıların toruna düşənlərin sayının artması elə fırıldaqçıların profesionallığından irəli gəlir. O qədər inandırıcı rol oynaya bilirlər ki, əli hər yerdən üzülmüş, çarəsiz insanların son qəpiyini də əllərindən alırlar”.

Sosioloq, həmçinin əlavə edib ki, "yaşam koç”ları həm də maratonlar təşkil edirlər:

"”İnsanları "Whatsapp” qrupuna yığırlar, orada təlimatlar verirlər ki, bu gün belə davranın, bunu edin və s. Bununla insanları yönləndirib adını "maraton” qoyurlar. Eyni zamanda onlara dəstək verirmiş kimi görünən şəxslərə pul verib şərhlər yazdırırlar - "Filan koçun dediklərini etdim, həyatımda hər şey yoluna girdi”,  "Bu gün 10 min qazandım, maşınım oldu” kimi pullu mesajlar. Bunlar vasitəsilə "yaşam koç”ları daha çox qurban yığa bilirlər”.