Sfera.az bildirir ki, mütəxəssislərin sözlərinə görə, Ukrayna xalqının təəccüblü müqaviməti və Qərbin verdiyi ağır silahlarla yanaşı, Kiyevin o qədər də nəzərə çarpmayan daha bir üstünlüyü var -  Ukrayna Dəmir Yolları. Bu ölkə 20 min km xətləri ilə dünyanın ən böyük dəmir yolu şəbəkələrindən birinə malikdir, 260 mindən çox işçisi var. 

Ekspertlər qeyd ediblər ki, dəmir yolları müharibə başlamazdan əvvəl Ukraynanın kənd təsərrüfatı və mədən sənayesində kiçik rol oynasa da,  Rusiyanın Qara dənizdəki blokadasına görə sanki baltaya çevrilib. Şəhərlər və qəsəbələr dağıntılar altında qaldıqdan və minlərlə insan həlak olduqdan sonra belə, qatarlar hələ də hərəkətdədir. Minlərlə mülki şəxsin təhlükəsiz sığınacaqlara qaçmasına kömək edən qatarlar dünya liderlərini də özü ilə daşıyır. ABŞ dövlət katibi Antoni Blinken, müdafiə naziri Lloyd Ostin və digər Qərb rəsmiləri Polşadan qatarlarla Kiyevə səfər ediblər.

Mütəxəssislər bildirirlər ki, sözügedən dəmir yolları Rusiya qüvvələrinin Ukraynaya nəzarəti niyə asanlıqla ələ keçirə bilmədiklərini izah edir. Onların iddiasına görə, Rusiyanın işğalın ilkin mərhələlərində dəmir yollarından tam istifadə edə bilməməsi logistik problemlərə, rus yük maşınlarının palçığa ilişib qalmasına səbəb olub. 

Londonda yerləşən "Royal United Services” İnstitutunun Rusiya üzrə eksperti Emili Ferris, "Dəmir yolları Rusiya quru qoşunlarının hərəkətinə təsir etdiyinə görə münaqişədə çox mühüm rol oynayıb. Rusiya qoşunlarının şimalda yaşadığı bütün problemlər onların logistik mərkəzlərə nəzarət edə bilməməsi ilə bağlıdır", - deyə bildirib.

Ukrayna Dəmir Yollarının baş direktoru Oleksandr Pertsovski Rusiya qüvvələrinin Ukraynada dəmir yolu infrastrukturunu hədəf almadıqlarını bəyan edib. Etibarlı təchizat xətlərinə nəzarəti ələ keçirə bilməyən Rusiya indi əvəzində onu mərhələli şəkildə dayandırmaq niyyətindədir. Rusiya qoşunları ötən həftə ölkənin mərkəzi və qərb bölgələrində 5 qatar stansiyasını hədəfə alıb. Qeyd olunub ki, hazırda Rusiya üçün dəmiryol xəttini dağıtmaq daha vacibdir. Çünki Qərb müttəfiqləri Kiyevə yardımlarını daha çox quru və dəmir yolu ilə göndərirlər. 

Hərbi analitiklər iddia edirlər ki, Rusiya qatar xəttinə hücum etməklə ukraynalıların mülki nəqliyyat infrastrukturuna inamını itirməsini istəyib. Ancaq bunu etmək Rusiyanın düşündüyü qədər asan deyil. Çünki qurulan sistem kifayət qədər güclüdür. Dəmir Yollarının baş direktoru Pertsovski indiyədək hücuma məruz qalan hər bir xəttin dərhal təmir olunduğunu söyləyib.