Sfera.az bildirir ki, sözügedən iddia Monakodakı evindən, əkiz övladlarından və yaşadığı sağlamlıq problemlərini əsas gətirərək uzun müddətdir ailə üzvü kimi vəzifələrindən uzaq olan Şahzadə Şarlinlə Albert arasındakı gərginliyi bir daha gündəmə gətirib. Fransanın "Voici” jurnalının yazdığına görə, Şahzadə Albert həyat yoldaşı Şarlinlə dövlət işlərinə qayıtması, yəni qatıldığı tədbirlərdə onun yanında olması üçün "tam məxfi” müqavilə imzalayıb. Bu müqaviləyə əsasən, Albert Şarlenə hər il 12 milyon avro ödəməyə razı olduğu deyilib. Jurnalın bu iddiası 2011-ci ildə ailə quran cütlüyün heç də xoşbəxt olmadığı haqda ehtimalları gücləndirib.

Digər tərəfdən, Şahzadə Şarlinin ilk dəfə infeksiyaya yoluxduğu üçün Cənubi Afrikada 10 ay qaldığı irəli sürülüb. Monakoya qayıtdıqdan sonra onun İsveçrədəki klinikalardan birində müalicə olunduğu və bir daha görünmədiyi açıqlanıb. Lakin o, son 15 gündə əri və uşaqları ilə iki dəfə iki fərqli tədbirdə ictimaiyyət və kameralar qarşısına keçib. Bu vəziyyət şahzadənin sağlamlığını bərpa etməsi və vəzifəsinə qayıtması kimi şərh edilib. Bununla belə, "Voici”nin iddiasına görə, müşahidə edilənlərin arxasında imzalandığı deyilən milyon avroluq müqavilə var.

Eyni iddianı "Paris Match Belgium” adlı nəşr də yayımlayıb. Bu nəşrə görə, Şarlin müqavilə çərçivəsində bəzi tədbirlərdə iştirak edəcək. Bunlara onun keçən həftə qatıldığı F1 Qran Prisi və Monakonun mühüm icma tədbirlərindən biri olan "Gül Balı” daxildir. Monako Sarayı hələlik bu iddialara münasibət bildirməyib.