"Bu, müharibənin 3-cü fazası olacaq. Əks-hücum əməliyyatlarında əsas istiqamətin Xerson olacağını bilmək üçün hərbi ekspert olmağa gərək yoxdur. Bu vilayətin asanlıqla əldən verilməsi hadisəsində çoxlu qaranlıq və şübhəli məqamlar var. Müharibədən sonra bu epizod cinayət araşdırmasının mövzusu olacaq. Xersonu azad etməklə, həm Rusiyanın Krıma açdığı quru yolu təkrar bağlanacaq, həm də yarımadanı geri qaytarmaq şansı yaranacaq”.

Ş.Cəfərli qeyd edib ki, müharibədən əvvəl Ukraynanın Krımı hərbi yolla geri alması ehtimalı fantastik ideya kimi görünürdü:

"Amma artıq belə görünmür. Başa düşürəm ki, bu, çox çətin və riskli variantdır, lakin tarixi şans yaranıb. "İslanmış" Ukrayna bu "yağış"dan da qorxmursa və hər cür itkini gözə almağa hazırdırsa, Krımı azad etmək qeyri-mümkün bir məsələ deyil. Müharibənin davam etməsini və Rusiyanın zəifləməsini istəyən bəzi NATO ölkələri də bu işdə Kiyevə dəstək verəcəklər”.