Sfera.az bildirir ki, Merilend ştatının 57 yaşlı sakini David Bennett Merilend Universitetinin tibbi mərkəzində dünyasını dəyişib. Hadisənin 8 mart tarixində baş verdiyi deyilib. 

"Usa Today”in xəbərinə görə, David Bennetin səhhəti son günlər pisləşib, lakin ölüm səbəbi hələ müəyyən edilməyib. Xəstəxananın sözçüsü Deborah Kotz qeyd edib ki, ölüm anında konkret səbəb müəyyən edilməyib və tədqiqatçılar Bennettin ölümünü araşdıracaq.

Qeyd edək ki, David Bennett GMO donuz ürəyi transplantasiyası prosesindən keçmiş ilk şəxs olub. Sözügedən əməliyyat 7 yanvar tarixində baş tutub. Merilend Universitetinin Tibb Mərkəzinin həkimləri deyib ki, transplantasiya genetik cəhətdən dəyişdirilmiş heyvandan alınan ürəyin insan orqanizmində dərhal rədd edilmədən işləyə biləcəyini göstərib. 57 yaşlı David Bennett isə, təcrübənin işləyəcəyinə heç bir zəmanət olmadığını bilirmişdi. O, əməliyyatdan bir gün əvvəl , "Yaşamaq istəyirəm. Bilirəm ki, bu, qaranlıqda vurulmuş bir güllədir, amma bu mənim son seçimimdir", - deyə söyləmişdi.