Sfera.az bildirir ki, bunu aktyor Azər Aydəmir Rusiya-Ukrayna müharibəsi ilə bağlı son günlər ölkədə rus dilli təhsilin yığışdırılması təklifi barədə danışarkən deyib. O qeyd edib ki, məsələ dildə deyil, bizim incikliyimizdədir:

"Xocalını, 20 yanvarı, 1937-ci il repressiyalarını, Hüseyn Cavidi, Mikayıl Müşfiqi xatırlayarkən biz əsəbiləşirik, acizləşirik, gücsüzlüyümüzdən zəncir çeynəyirik. Nəticədə düşmən olaraq, fizioloji hədəf olmayan rus dilinin üstünə düşürük. Lakin hazırda müharibə tərəfləri və bütün dünya liderləri bu faciəyə son qoymaq üçün aqressora rus dilində müraciət edirlər. Bundan əlavə Ukraynanı dəstəkləyən, Rusiya hakimiyyətinin aqressiv hərəkətinə qarşı çıxan sosial şəbəkə dostlarınız da rusdillilərdir”.

Aktyor əlavə edib ki, rus dilindən imtina etmək, hazırda rus hökumətinin sanksiyalar qarşısında acizliyinə bənzəyir:

"Onu da deyim ki, hər hansı bir dildən və ya digər ölkənin nemətindən imtina etmək və bu qəbildən hərəkətlər, toplumu əsaslandırılmamış "milliyətçiliyə" gətirib çıxarır - bu da bizə soxuşdurulan ideologiya kimi heç də yaxşı şey deyil!  "Milliyətçi” sözünün kökündə, oxunuşundan da hiss etdiyiniz kimi "seleksiya" tonu var. Yəni mən seçirəm: "kim yaxşıdır, kim pis" kimi əhval var, bu yanaşmada. Mən hətta bu kəliməni irqçiliklə də müqayisə edərdim”.