Sfera.az xəbər verir ki, bunu iqtisadçı-ekspert Eldəniz Əmirov bildirib. Ekspert günəmuzd çalışan, gəliri aşağı olan ailələrin çətinlik çəkdiyini qeyd edib:

"Aylıq maaş almayan aztəminatlı və ya günəmuzd çalışan insanlar əməkhaqqı artımlarından bəhrələnə bilmədilər. Belə qəbildən olan insanların həyat şəraitinə infilyasiya ciddi təsir etməkdədir. Ona görə də bu insanların maddi təminat məsələsinə yenidən baxılmasına böyük ehtiyac var. Hazırda mövcud neft qiymətləri də büdcəyə yenidən baxmaq üçün geniş imkanlar yaradır ki, bu yolla əmək haqqı artımlarından yararlana bilməyən, amma həyat səviyyələrinə infilyasiyanın ciddi problem yaratdığı insanlara dəstək göstərilsin. Aydın məsələdir ki, ölkə müharibədən çıxıb, quruculuq işləri, şəhid və qazi ailələrinə dəstək, dövlət investisiya layihələri, ərzaq təhlükəsizliyinin təminatı və s. məsələlərlə əlaqədar xeyli maliyyə vəsaiti xərcləyirik. Bütün bunlar həm işlərin sürətinə görə, həm də çox şaxəliliyinə görə həqiqətən alqışa layiqdir. Amma bunlar aztəminatlı insanların infilyasiya tərəfindən əzilməsinə sakit dayanıb baxmağa əsas ola bilməz”. 

E.Əmirov maddi dəstək məqsədilə yenidən büdcəyə baxmağın lazım olduğunu deyib:

"Ölkənin 53 milyard dollara yaxın ehtiyat valyutası var. Yəni təhlükəsizlik yastığı güvəniləcək dərəcədədir. Neft də büdcədə 50 dollar götürülsə də, ən azı 2 dəfədən artıq baha satılır. Odur ki, heç olmasa infilyasiyanın daha çox təsir etdiyi aztəminatlı insanları dəstəkləmək üçün büdcəyə yenidən baxmaq üçün heç bir maneə yoxdur. Dəstəyin formasına gəldikdə isə bunu ən müxtəlif forma və üsullarla reallaşdırmaq olar”.