Azərbaycanda ən çox bu qida insanların zəhərlənməsinə səbəb olur - Xəbərdarlıq
Sağlıq
11:01 / 16.02.2022
776
"Ən çox ev şəraitində hazırlanan turşulardan zəhərlənmə hadisələri baş verir”.
Sfera.az bildirir ki, bunu Kliniki Tibbi Mərkəzin Toksikologiya şöbəsinin müdiri Azər Maqsudov deyib. O qeyd edib ki, bunun əsas səbəbi turşunun hazırlanması zamanı məhsulların düzgün yuyulmaması, lazımi miqdarda qaynadılmaması və ümumilikdə gigiyenik qaydalara riayət edilməməsidir:
"Turşunun qaynadılması düzgün olmadıqda infeksiya yaranır və bu infeksiya oksigensiz şəraitdə inkişaf edir. Bankanın qapağının şişməsi və ya turşunun tamının dəyişməsi məhsulun xarab olduğuna işarə edir”.
Mütəxəssis zəhərlənməni bildirən əsas amillərdən də söz açıb:
"Mədədə köp, hərarətin artması, ürəkbulanma və ishal. Bu halların hər hansı biri yaşanarsa, mütləq şəkildə həkimə müraciət edilməlidir. Turşulardan zəhərlənmənin ən ağır dərəcəsi botulizmdir. Bu xəstəlik ölümlə də nəticələnə bilir. Bu mövsümdə mümkün qədər diqqətli olmaq məsləhətdir”.
Günay Rəsulqızı
Sfera.az